मंसिर २८, २०७२- भोजभतेर र तडकभडकपूर्ण बैवाहिक कार्यक्रमहरुले चर्को रुप लिँदै गइरहेका बेला यहाँका एक युवाले आफ्नो बैवाहिक कार्यक्रममा हुने अनावश्यक खर्च जोगाएर विद्यालय र स्वास्थ्य चौकीका लागि सहयोग गरेका छन् । कुश्मा नगरपालिका-१८ पकुवाका सन्तोष पौडेलले विवाहको अनावश्यक खर्चमा हुने करिव दुई लाख रकम स्थानीय विद्यालय र स्वास्थ्य चौकीको पूर्वाधारका लागि लगानी गरेका हुन् ।
आइतबार पोखरास्थीत शर्मिला बरालसँग बैवाहिक सम्बन्ध गाँसेका पौडेलले पकुवास्थीत बिरेन्द्र उच्च माविलाई एक लाख ११ हजार एक सय ११ रुपैयाँको अक्षयकोष स्थापना गरे । त्यस्तै शंकरपोखरी स्वास्थ्य चौकीका लागि सुत्केरी गराउन आवश्यक ‘डेलिभरि बेड र पेरिनल लाइट’ हस्तान्तरण गरे । सोही कार्यक्रममा बिरामी बोक्न सुविधाका लागि उनले पकुवाकै प्रतिभा महिला समूहलाई आधुनिक स्टेचर सहयोग गरे ।