कुटुम्बको धुनमै झुमे दुबईमा नेपाली

उमाकान्त पाण्डे/उज्यालो । युएई, मंसिर २६ – उच्च तापक्रमबाट केही चिसिँदै गरेको दुबई मौलिक नेपाली बाजाको समूह कुटुम्बको प्रस्तुतिमा भने फेरि तातियो । नेपाली कर्णप्रिय धुनहरु गुन्जिदा नेपालमै आयोजित कुनै विशेष कार्यक्रममा पुगेको महसुश हुन्थ्यो । सांगितिक समुह कुटुम्बले शुक्रबार युएईको दुबईमा नेपाली बाँसुरी र सारंगीको धून समेत कार्यक्रममा प्रस्तुत गरेको थियो । चर्चित संगितकार हरि महर्जन समेतको प्रस्तुति समेटिएको कार्यक्रममा युएईमा व्यवसाय गर्दैै आईरहेका ब्यवसायी, विभिन्न नेपाली संघ संस्थाका प्रमुख तथा प्रतिनिधि, युएईमा कार्यरत नेपालीहरुको सहभागिता थियो । 

नेपालका ईन्द्रजात्रा लगायतका पर्वसँग जोडिएका विभिन्न मौलिक धुनबाट कार्यक्रम सुरु भयो । कुटुम्बले चर्चित नेपाली लोक गितका धुन प्रस्तुत गरेर कार्यक्रममा उपस्थित सबैलाई नचायो । धुनमै धेरै नेपाली रमाए । नमस्ते ट्राभल्स एण्ड टुरिजमले मुख्य प्रायोजन गरेको कार्यक्रममा एनआरएन युएईका अध्यक्ष सुदिप कार्की, नेपाली समाज युएईका अध्यक्ष चन्द्र प्रसाद सापकोटा लगायतका नेपाली समुदायका अगुवा पनि सहभागी थिए । युएईमा ब्यवसाय गर्दै आएका नेपाली ब्यवसायी शालिक सुवेदीले स्थानीय ब्यवस्थापन गरेको कार्यक्रममा जोएलुकास एक्सचेन्ज, एयर अरविया समुहले सहप्रायोजन गरेका थिए । 

लेकाली हे चोयाको डोको, सोह्रै बर्षे उमेरैमा म पनि झिल्के हुँदो हुँ, मोहनी लाग्ला हैलगायतका गितका धुन प्रस्तुत गर्दा कार्यक्रममा सहभागी भएका नेपालीहरु सबै उठेर नाँच्न पुगेका थिए । रातो र चन्द्र सुर्य जंगि निशान हाम्रो हुँदै रेशम फिरीरीसँगै कार्यक्रम सकिएको थियो । 

लामो समय मुलुकबाट बाहिर रहेका नेपालीलाई नेपाली मौलीक बाजा सुनाउने र नेपाली मौलिक बाजा प्रवासमा पनि चिनाउने अवसरका रुपमा कार्यक्रम आयोजना गरिएको कार्यक्रमका मुख्य प्रायोजक नमस्ते ट्राभल्स एण्ड टुरिज्मका सञ्चालक एकेन्द्र थापाले बताउनुभयो ।
News from Ujyaalo Online