चीनको झण्डा जलाउने ३ जना पक्राउ

कार्तिक १४, २०७२- उत्तरी छिमेकी मुलुक चीनको झण्डा जलाउने ३ जनालाई पर्सा प्रहरीले नियन्त्रणमा लिएको छ । पक्राउ पर्नेमा मधेसी जनअधिकार फोरमका केन्द्रीय सदस्य सन्जय यादव, सद्भावनाका जिल्ला अध्यक्ष इमदाद गद्दी र नेपाल परिवार दलका ओमप्रकाश सर्राफ रहेका छन् । सर्राफको पार्टीले केन्द्रमा सरकारलाई समर्थन गरेपनि उनी मधेस आन्दोलन र झण्डा जलाउने कार्यमा सक्रिय छन् । प्रहरी उपरीक्षक राजुबाबु श्रेष्ठका अनुसार शुक्रबार राति ३ जनालाई नियन्त्रणमा लिइएको हो । झण्डा जलाउने अन्यको पनि खोजी भइरहेको उनले बताए । नेपाललाई इन्धन दिन लागेको विरोधमा आन्दोलनरत दलका नेता तथा कार्यकर्ताले शुक्रबार वीरगन्जमा चीनको झण्डा जलाएका थिए । मधेस आन्दोलनलाई तुहाउन र इन्धन समस्या टार्न नेपाललाई इन्धन दिन लागेको विरोधमा झण्डा जलाइएको नेताले बताए । नेपालको आन्तरिक समस्यामा हस्तक्षेप नगर्न नेताहरुले शुक्रबार चीनलाई चेतावनी समेत दिएका थिए ।

Read More On; Kantipur