दाङ निवासी साहित्यकार प्रियासनले नायिका नम्रता श्रेष्ठले अहिलेसम्म झेल्नुपरेको समस्या, चुनौती र संघर्ष तथा त्यसपछिको सफलतालाई उपन्यासमा समावेश गरेका छन् । दसैंभन्दा अगाडि बजारमा उपन्यास निकाल्ने तयारी गरिरहेका प्रियासनले उपन्यासका लागि नायिका नम्रता श्रेष्ठसँग फोनबाट सयौं पटक वार्तालाप गरेको बताए । प्रियासनका अनुसार उपन्यासमा नम्रता श्रेष्ठको चलचित्र क्षेत्रको मात्र विषयवस्तु नभएर नम्रता सामाजिक अभियानमा सक्रियताका साथ लागेको प्रसंगहरू पनि समावेश छन् । उपन्यासका सबै विषयवस्तु इमेलमार्फत नम्रताले अध्ययन गरेको बताउने प्रियासन भन्छन्– ‘नायिका नम्रता श्रेष्ठले जीवनमा ठूलै संघर्ष गरेकी छन् । संघर्षले उनलाई आज सफल बनाएको छ ।’
नम्रताको जीवनबाट धेरै कुरा सिक्न सकिने बताउने प्रियासनले उपन्यासलाई पठनीय बनाउन समाजमा घटेका अन्य विभिन्न प्रसंगलाई पनि समावेश गरेको बताए । ‘उपन्यासमा भूकम्प गएको समयमा नम्रताले चलाएको सामाजिक अभियानका बारेमा पनि प्रसंगहरू समावेश गरिएका छन्,’ साहित्यकार प्रियासनले थपे, ‘मानिसहरूले स–साना घटनामा पनि आत्महत्यासम्मका कार्यहरू गर्छन् तर नम्रताले आफूमाथि परेको संकट र चुनौतीलाई पार गरिन् । संघर्ष गरेपछि सफल भइन्छ भन्ने दरिलो नमुना बन्न सफल नम्रताको यही कुराबाट प्रभावित भएर उपन्यास तयार पारेको छु । समग्रमा भन्ने हो भने उपन्यास सन्देशमूलक र पठनीय बनेको छ ।’
News From: Nari